தமிழகம் உருப்படணும்னா ரஜினி முதல்வர் வேட்பாளர் ஆகணுமாம்... சொல்கிறார் குருமூர்த்தி!

தமிழகம் உருப்பட வேண்டும் என்றால், வரும் சட்டப்பேரவைத் தேர்தலில் நடிகர் ரஜினிகாந்த் முதல்வர் வேட்பாளராக களமிறங்க வேண்டும் என்று துக்ளக் ஆசிரியர் எஸ்.குருமூர்த்தி வலியுறுத்தியுள்ளார்.

"நடிகர் ரஜினிகாந்த் நவம்பர் மாதம் கட்சி ஆரம்பிக்க வாய்ப்புள்ளது" என்று அவரது நெருங்கிய வட்டத்தில் இருக்கும் முக்கிய நபராக அறியப்படும் கராத்தே தியாகராஜன் அண்மையில் ஆருடம் கூறியிருந்தார். கராத்தேவின் இந்த கருத்து ரஜினி ரசிகர்கள் பெரும் எதிர்பார்ப்பை ஏற்படுத்தியுள்ளது.

 

ரசிகர்களின் இந்த எதிர்பார்ப்பில் எண்ணெய் ஊற்றுவதை போல, துக்ளக் ஆசிரியர் எஸ். குருமூர்த்தி, மற்றொரு கருத்தை இன்று கொளுத்தி போட்டுள்ளார்.

அதாவது "தமக்கு முதல்வராகும் ஆசை இல்லை என்ற தமது முடிவை ரஜினி மறு சிந்தனை செய்ய வேண்டும் என்று நீங்கள் மட்டும் கூறுவது எதை காட்டுகிறது" என்று துக்ளக் வாசகர் ஒருவர், அதன் ஆசிரியரிடம் கேள்வியெழுப்பியுள்ளார். துக்ளக் வார இதழின் கேள்வி -பதில் பகுதியில் வாசகரின் இக்கேள்வி இடம்பெற்றுள்ளது.

அதற்கு, "ரஜினி தமது முடிவை மறு சிந்தனை செய்து, அவர் முதலமைச்சர் வேட்பாளராக தன்னை முன்னிறுத்தினால் தமிழ்நாடு உருப்பட வாய்ப்பு இருக்கிறது என்பதை காட்டுகிறது" என்று எஸ்.குருமூர்த்தி பதிலளித்துள்ளார்.

சில மாதங்களுக்கு முன், சென்னையில் செய்தியாளர்களை சந்தித்த நடிகர் ரஜினி, "கட்சி தொடங்குவதற்கான பணிகள் நடைபெற்று வருகின்றன" என்று தெரிவித்து ரசிகர்களை சில கணம் மகிழ்ச்சியில் திளைக்க வைத்தார். அதேசமயம், " தமக்கு முதல்வர் ஆசை இல்லை என்றும், இதனை ரசிகர் ஏற்றுக்கொள்ள வேண்டும்" எனவும் அவர் கூறியிருந்தார்.

 

அப்போது. "முதல்வர் ஆசை இல்லை என்ற தமது முடிவை ரஜினி மறு சிந்தனை செய்ய வேண்டும்" என்று எஸ்.குருமூர்த்தி வலியுறுத்தியிருந்தார் என்பது குறிப்பிடத்தக்கது..