சமூக அவலங்களை காட்டிக்கொடுத்த கொரோனா: ஐநா தலைவர் காட்டம்!
ஏற்றத்தாழ்வுகளால் நாம் அறுநிலையை எட்டியுள்ளதாக தெரிவித்துள்ள ஐநா பொதுச்செயலாளர் அண்டோனியோ கட்ரஸ், சர்வதேச அளவில் ஏற்றத்தாழ்வுகளை முடிவுக்கு கொண்டுவர வேண்டும் என வலியுறுத்தியுள்ளார்.
அண்மையில் அமெரிக்காவில் ஜார்ஜ் ஃப்ளாய்ட் என்ற கருப்பினத்தவர் போலீஸ் காவலில் வைத்து கொல்லப்பட்டது சர்வதேச அளவில் பெரிய பிரச்சினையாக உருவெடுத்தது. இதைத்தொடர்ந்து மக்கள் எல்லா வகையிலும் சந்திக்கும் ஏற்றத்தாழ்வுகள் ஒரு விவாதப் பொருளாக மாறியது. அதனுடன், கொரோனாவால் மக்கள் சந்திக்கும் இன்னல்களும் ஏற்றத்தாழ்வுகளின் கொடூரத்தை உறுதிப்படுத்தும் வகையில் உள்ளது.
இந்நிலையில், சமூகத்தின் எலும்புக் கூட்டில் உள்ள முறிவுகளை காட்டிக்கொடுக்கும் ஒரு எக்ஸ்-ரே கருவியாக கோவிட்-19 நோய் வந்துள்ளதாக ஐநா பொதுச்செயலாளர் அண்டோனியோ கட்ரஸ் தெரிவித்துள்ளார். இதுகுறித்து அவர் நெல்சன் மண்டேலா பிறந்தநாள் விரிவுரை நிகழ்வில் பேசுகையில், “எல்லா இடங்களிலும் இருக்கும் பிழைகளையும், போலிகளையும் கொரோனா காட்டிக்கொடுத்துவிட்டது.
தடையற்ற சந்தைகளால் அனைவருக்கும் மருத்துவ சேவை வழங்க முடியும் என்பது பொய். சம்பளமே இல்லாமல் தொண்டுப் பணியாளர்கள் செய்வதெல்லாம் ஒரு வேலையே அல்ல என்பது கற்பனை. இனவெறியில்லாத உலகில் வாழ்கிறோம் என்பது மாயை. நாம் அனைவரும் ஒரே நிலையில்தான் இருக்கிறோம் என்பது கட்டுக்கதை.
வளர்ந்த நாடுகள் தங்களை மட்டும் காப்பாற்றிக்கொள்ள ஏராளமாக முதலீடு செய்கின்றன. ஆனால் ஆபத்து காலத்தில்கூட வளரும் நாடுகளுக்கு ஆதரவளிக்கத் தவறிவிட்டன. உலகின் பாதி செல்வத்தை 26 பணக்காரர்கள் மட்டுமே வைத்துள்ளனர். இதுபோக இனம், பாலினம், நிறம், வர்க்கம், பிறப்பிடம் ஆகியவற்றின் அடிப்படையில் இன்னும் மக்கள் ஏற்றத்தாழ்வுகளை சந்தித்துக்கொண்டு இருக்கின்றனர்.
உச்சத்தில் இருந்துதான் ஏற்றத்தாழ்வுகள் உருவாகின்றன. உலகளாவிய நிறுவனங்களில் சீர்திருத்தங்களை மேற்கொள்வதே ஏற்றத்தாழ்வுகளை சரிசெய்வதற்கான முதல் படி. வளரும் நாடுகளுக்கு நிறைய உதவிகளை வழங்க வேண்டும். அவர்களின் கடன்களை ரத்து செய்வது உட்பட எல்லா வகையிலும் ஆதரவளிக்க வேண்டுமென கேட்டுக்கொள்கிறேன்” என்று தெரிவித்துள்ளார்.
